Kampionia e Kosovës në basketboll, Trepça, ka zhvilluar ndeshjen e saj të fundit në fazën e grupeve të FIBA Europe Cup, ku u mposht nga skuadra polake Anwil me rezultat 96:78 (21:17, 32:19, 21:22, 22:20).
Skuadra e Anwil krijoi avantazh të konsiderueshëm në pjesën e parë, të cilën e përfundoi me rezultat 53:36. Pjesa e dytë ishte më e baraspeshuar, por epërsia e fituar më herët mjaftoi për fitoren e ekipit polak.
Trepça përfundoi fazën e grupeve pa asnjë fitore në një grup të vlerësuar si mjaft i vështirë. Ndërkohë, Anwil e mbylli grupin me tri fitore dhe tri humbje.
Për Trepçën, Chad Brown ishte më i dalluari me 19 pikë, ndjekur nga JaCori Payne me 18 dhe Mikaile Tmusiq me 17 pikë.
Ndeshja mes Braunschweig dhe PAOK do të vendosë skuadrën që do të kryesojë grupin.
