Presidenti i SHBA-së, Donald Trump, njoftoi se pati një telefonatë “shumë të mirë” me presidentin kinez Xi Jinping dhe se ka pranuar ftesën për të vizituar Pekinin në prill.
Në një postim në Truth Social, Trump shkroi se gjatë bisedës u diskutuan tema si Ukraina/Rusia, fentanili, soja dhe “produkte të tjera bujqësore”. Ai e përshkroi marrëdhënien midis SHBA-së dhe Kinës si “jashtëzakonisht të fortë”.
Trump tha gjithashtu se i kishte thënë Xit se ai do të bëjë një vizitë shtetërore në SHBA më vonë gjatë vitit, pas pranimit të ftesës për vizitë në Pekin.
Agjencia shtetërore kineze Xinhua raportoi më herët se gjatë telefonatës udhëheqësit diskutuan bashkëpunimin dypalësh dhe çështjen e Tajvanit. Sipas Xinhua-s, Xi i tha Trump që të dy vendet duhet të “ruajnë vrullin” pas takimit të tyre muajin e kaluar në Korenë e Jugut, ku u shprehën për lehtësimin e tensioneve tregtare.
Në postimin e tij, Trump e quajti telefonatën një vazhdim të takimit të tyre “shumë të suksesshëm” në Korenë e Jugut dhe tha se që atëherë ka pasur përparim të konsiderueshëm nga të dy palët për të mbajtur marrëveshjet e azhurnuara dhe të sakta.
Trump dhe Xi u takuan në tetor, për herë të parë që nga viti 2019, në një takim të ndjekur me vëmendje ndërsa dy ekonomitë kryesore botërore mbeten të përfshira në një luftë tregtare.
Burimi: Telegrafi.
