Edhe pse Austria arriti një fitore 2:0 kundër Qipros, atmosfera brenda ekipit kombëtar nuk ishte festive. Arsyeja lidhej me vështirësitë logjistike në aeroport dhe faktin se skuadra ende nuk ka siguruar kualifikimin matematik për Kupën e Botës.
Delegacioni austriak udhëtonte me mbi tre ton pajisje, duke shkaktuar mbingarkesë në avionin për në Vjenë. Si pasojë, rreth 45 valixhe mbetën në Qipro. Marko Arnautovic dhe bashkëlojtarët e tij mbërritën në Vjenë në orën 04:20 të mëngjesit dhe u futën në gjumë pas orës 05:00.
Piloti kërkoi falje gjatë fluturimit për situatën e pazakontë, ndërsa sipas portalit austriak Krone, edhe ai vetë ndjehej në pozitë të vështirë.
Problemet nisën që në aeroportin e Pafosit, pasi skuadra ishte zhgënjyer nga lajmi se Bosnja dhe Hercegovina kishte mundur Rumaninë 3:1, duke penguar Austrinë të siguronte kualifikimin e parakohshëm. Festimet janë shtyrë dhe vendi i parë në grup do të vendoset në ndeshjen ndaj Bosnjës dhe Hercegovinës në Vjenë.
Pas ndeshjes në Qipro, plani ishte kthimi i shpejtë për t’u fokusuar te sfida finale, por ngarkimi i pajisjeve vonoi nisjen me mbi dy orë. Stafi i aeroportit nuk arriti të përballonte 2.8 ton pajisje, ndaj ngarkimi zgjati më tepër se pritej.
Lojtarët u futën në avion rreth orës 01:00, por fluturimi nuk mundi të nisej derisa u shkarkuan disa bagazhe. Avioni u ngrit në fluturim në orën 02:30.
Me mbërritjen në Vjenë, mediat raportuan “llotarinë e bagazheve”. Trajneri Ralf Rangnick dhe stafi ishin me fat, pasi bagazhet e tyre mbërritën, por kryetari i bordit mbikëqyrës, Josef Proll, dhe disa të tjerë nuk i morën valixhet deri ditën tjetër.
Pavarësisht vështirësive, mbetet për t’u parë nëse ky incident do të ndikojë në formën e Austrisë. Një gjë është e qartë: sfida kundër Bosnjës dhe Hercegovinës është vendimtare.
Vëzhguesi
November 17, 2025
