Ministri i Jashtëm kinez Wang Yi tha se Japonia “ka kaluar vijën e kuqe” me komentet e kryeministres japoneze Sanae Takaichi që sugjerojnë një ndërhyrje të mundshme ushtarake ndaj Tajvanit.
Wang e quajti të “tronditshme” deklaratën e Takaichit bërë më 7 nëntor, në të cilën ajo tha se një bllokadë detare kineze ose veprime të tjera kundër Tajvanit mund të justifikonin një përgjigje ushtarake nga Tokio.
Takaichi është në detyrë për më pak se një muaj, por komentet e saj kanë shkaktuar përshkallëzim të tensioneve dhe një përplasje diplomatike midis Pekinit dhe Tokios.
Sipas Wang, udhëheqësit aktualë të Japonisë “kanë dërguar publikisht sinjalin e gabuar për përpjekjen e ndërhyrjes ushtarake në çështjen e Tajvanit, kanë thënë gjëra që nuk duhet t’i kishin thënë dhe kanë kaluar një vijë të kuqe që nuk duhej të ishte prekur”. Ai tha se Kina duhet t’u “përgjigjet me vendosmëri” këtyre veprimeve dhe shtoi se të gjitha vendet kanë përgjegjësinë për të “parandaluar ringjalljen e militarizmit japonez”.
Pekini i dërgoi të premten një letër Sekretarit të Përgjithshëm të OKB-së, Antonio Guterres, duke kritikuar atë që e quajti një “shkelje të rëndë të së drejtës ndërkombëtare” dhe normave diplomatike nga ana e Takaichit.
Në letër, ambasadori i Kinës në OKB, Fu Cong, shkroi se “nëse Japonia guxon të përpiqet të ndërhyjë në mënyrë të armatosur në situatën ndërkufitare, ky do të ishte një akt agresioni”. Ai shtoi se “Kina do ta ushtrojë me vendosmëri të drejtën e saj të vetëmbrojtjes sipas Kartës së OKB-së dhe ligjit ndërkombëtar dhe do të mbrojë me vendosmëri sovranitetin dhe integritetin e saj territorial.”
Në përgjigje, Ministria e Jashtme e Japonisë i hodhi poshtë pretendimet e Kinës si “krejtësisht të papranueshme” dhe tha se angazhimi i Japonisë për paqen mbetet i pandryshuar.
Burimi: Telegrafi.
