Wesley Clark në Hagë: Thaçi nuk kishte rol ushtarak gjatë konfliktit në Kosovë

Në dëshminë e tij në Gjykatën Speciale në Hagë, gjenerali amerikan Wesley Clark theksoi se Hashim Thaçi nuk kishte rolin e komandantit ushtarak gjatë konfliktit në Kosovë. Clark deklaroi se, gjatë takimeve të Marrëveshjes së Rambujesë, Thaçi ishte një nga figurat më me autoritet të delegacionit shqiptar, por nuk ishte i përfshirë në operacionet ushtarake. ‘Ai ishte i veshur mirë, fliste gjermanisht dhe nuk kishte shumë njohuri për operacionet ushtarake. Nuk fliste shumë anglisht në atë kohë. Unë nuk flisja shumë gjermanisht dhe ishte e vështirë të komunikonim. Por, ai nuk ishte komandant ushtarak,’ tha Clark. Gjenerali amerikan shtoi se Thaçi nuk mund të ndihmonte në identifikimin e objektivave ushtarake dhe nuk kishte një kuptim bazik të operacioneve. Ai gjithashtu pohoi se gjatë vitit 1998, informacioni për Ushtrinë Çlirimtare të Kosovës (UÇK) ishte i kufizuar dhe se grupet që vepronin ishin formuar kryesisht si reagim ndaj shtypjes serbe. Clark theksoi se këto grupe u aktivizuan masivisht pas vrasjes së familjes Jashari, e cila shërbeu si alarm për situatën në terren.