Yann LeCun, njëri nga emrat kryesorë të inteligjencës artificiale, ka njoftuar se do të largohet nga Meta për të themeluar një firmë të re, duke u fokusuar në atë që e quan “inteligjenca e përparuar e makinës”.
Pak javë më parë, ai u nderua në St James’s Palace me një çmim nga Mbreti Charles për kontributet në fushën e IA-së. Gjatë karrierës së tij në Meta, ku punoi për 12 vjet, LeCun fitoi edhe Çmimin prestigjioz Turing dhe drejtoi laboratorin e Kërkimit Themelor të IA-së (FAIR). Ai kaloi 5 vjet si drejtor themelues i FAIR dhe 7 vjet si shkencëtor kryesor i IA-së në kompani.
Në një seri postimesh në Threads, LeCun falënderoi themeluesin Mark Zuckerberg dhe vlerësoi ndikimin e FAIR, duke e cilësuar si “arritjen e tij më të madhe jo-teknike”. Ai tha se përparimi i laboratorit ndikoi ndjeshëm në kompaninë Meta, në fushën e IA-së dhe në komunitetin teknologjik.
Largimi i tij vjen ndërsa zëra dhe analiza flasin për një korrigjim të mundshëm të tregut të IA-së, për shkak të rritjes së vlerësimeve dhe shpenzimeve. Investitorët dhe drejtues të industrisë kanë paralajmëruar se një rënie në sektorin e IA-së mund të ketë efekte të gjera ekonomike.
LeCun ka dalë në kundërshtim me pjesën më të madhe të sektorit për qasjen ndaj modeleve të mëdha gjuhësore (LLM). Ai argumenton se LLM-të, të cilave u jepen sasi të mëdha të dhënash ekzistuese për të gjeneruar përgjigje, do të jenë më pak të dobishme për krijimin e sistemeve që i afrohen inteligjencës njerëzore.
Në vend të kësaj, LeCun përqendrohet në të mësuarin vizual dhe në mënyrat se si mësojnë fëmijët dhe kafshët e vogla, duke ndjekur qasjen që ai e quan “inteligjencë e përparuar e makinës”. Ai tha se do të vazhdojë të ketë një marrëdhënie me Meta pas krijimit të firmës së re dhe se do të jetë partner i kompanisë së tij të re.
Ndërkohë, qëndrimet e tij mbi rreziqet ekzistenciale të IA-së kanë qenë të ndryshme nga disa kolegë, si Geoffrey Hinton dhe Yoshua Bengio. Në 2023 LeCun i quajti shqetësimet për rreziqe ekzistenciale “jashtëzakonisht qesharake”.
Disa kolegë dhe ekspertë kanë përmendur edhe kritika ndaj qasjes së tij. Profesori Gary Marcus vlerësoi kontributet e LeCun, por tha gjithashtu se ai shpesh ka injoruar punën e të tjerëve në fushë. /Telegrafi/
