Votuesit në Republikën Serbe të Bosnjës po zgjedhin sot një president të ri në zgjedhjet e parakohshme, të shpallura pasi ish-presidenti Milorad Dodik u hoq nga detyra dhe u ndalua nga politika për gjashtë vjet, shkruan Reuters.
Vota do të përcaktojë nëse rajoni i dominuar nga serbët do të largohet nga agjenda nacionaliste e Dodikut apo do të vazhdojë me politika separatiste që rrezikojnë kohezionin e brendshëm të vendit, raporton Telegrafi.
Dodik, një separatist pro-rus, u dënua më 2 shkurt për sfidimin e gjykatës kushtetuese dhe të dërguarit ndërkombëtar për paqe, duke shkaktuar krizën më të madhe politike në Bosnjë që nga fundi i luftës para rreth 30 vjetësh. Ai ka hedhur poshtë vendimin; një këshill apeli e mbështeti në gusht, ndërsa gjykata kushtetuese konfirmoi vendimin këtë muaj. Në tetor, Dodik caktoi papritur një aleat si zëvendësues të përkohshëm.
Zyrat presidenciale në rajon janë kryesisht ceremoniale, por gjatë 25 viteve të fundit Dodik kishte tërhoqur për vete shumë kompetenca ekzekutive.
Në qytetin më të madh të Republikës Serbe, Banja Lluka, shumë prej atyre që votuan herët të dielën shfaqeshin të zhgënjyer. “Nuk ka asgjë për të pritur. Na mbetet të menaxhojmë vetë”, tha Bozidar Knezevic.
Nga gjashtë kandidatët për postin presidencial, dy konsiderohen favoritë: aleati i Dodik, Sinisa Karan, nga aleanca qeverisëse e Social Demokratëve të Pavarur, dhe kandidati i opozitës Branko Blanusha i Partisë Demokratike Serbe.
Mandati presidencial do të zgjasë më pak se një vit, pasi zgjedhjet e përgjithshme janë planifikuar për tetorin e ardhshëm.
Dodik ka bërë fushatë aktive për Karanin, i cili aktualisht shërben si ministër i Zhvillimit Shkencor dhe Teknologjik të Republikës Serbe. Karan ka përdorur moton se një votë për të është “votë për presidentin Dodik”, dhe fotografi të tyre janë shfaqur në posterë nëpër rajon.
Blanusha, profesor universiteti dhe fytyrë e re në politikë, mbështetet nga shumica e partive opozitare serbe dhe ka premtuar të luftojë korrupsionin dhe “kapjen shtetërore” të burimeve në Republikën Serbe.
Më shumë se 1.2 milion njerëz kanë të drejtë vote. Rezultatet paraprake priten pas mbylljes së qendrave të votimit në orën 18:00.
Telegrafi
