Kryetari i Kuvendit të Republikës së Maqedonisë së Veriut, Afrim Gashi, ka bërë të ditur se aktvendimi për zhvillimin e zgjedhjeve të përsëritura në disa komuna është nënshkruar dhe se ato do të zhvillohen më 11 janar 2026. Sipas Gashit, këto zgjedhje do të mbahen në komunat e Gostivarit, Vrapçishtit, Mavrovës, Rostushës dhe Qendrës Zhupë. Zhvillimi i këtyre zgjedhjeve është në përputhje me Kushtetutën e vendit, Kodin Zgjedhor dhe rregulloret përkatëse legjislative.
Me hyrjen në fuqi të këtij vendimi, institucionet përkatëse do të fillojnë zbatimin e afateve dhe procedurave ligjore. Gashi ka ftuar Komisionin Shtetëror të Zgjedhjeve dhe komisionet komunale ta menaxhojnë procesin me përpikëri dhe transparencë. Ai gjithashtu u bën thirrje organizatave mbikëqyrëse për të vepruar me profesionalizëm.
Në këtë kontekst, Gashi ka apeluar gjithashtu edhe te partitë politike dhe kandidatët që të zhvillojnë një proces zgjedhor të qetë, të drejtë dhe demokratik, duke respektuar standardet zgjedhore dhe vlerat evropiane. Ftesa është shtrirë edhe te qytetarët për të marrë pjesë masivisht në votim, duke theksuar rëndësinë e secilit votë në forcimin e legjitimitetit institucional dhe vendimmarrjen lokale. Kuvendi i Republikës së Maqedonisë së Veriut mbetet i përkushtuar ndaj zhvillimeve demokratike dhe konsolidimit të institucioneve në vend.
